كمطورين ديال مواقع الويب, أو مستثمرين فمجال المعلوميات. اصبح من دروري الآن الدخول في عالم الجديد وللي هو الاصدار الثالث من مواقع الويب web3.
من هنا غادي نحاولو بكل بساطة أننا نطرحوا بعض الأسئلة للي غادي يجينا من بعد ساهل اننا نجاوبو عليهم…
شنو هو البلوك شين ؟ شنو هو الفرق بين الاصدار الثاني و الاصدار الثالث من الويب؟ شنو هوما المميزات نتاع الاصدار الثالث من الويب ؟
شنو هو البلوك شين Blockchain ؟
إلا جيت أنا ندويلك على هد التكنولوجيا كيفاش تتخدم خاص نبدالك من كفاش تتبرمجات… ﻷن في البرمجة نتاعها تتدخل مجموعة نتاع هياكل البيانات بحال (Linkedlist , Array). ومجموعة نتاع الخورزميات للي تتعتابر المحرك الاساس ديال هد التكنولوجيا… اجي نشوفو المهم للي خاصك تعرف باش تفهم كيفاش أن النصخة الثالثة من الويب تتخدم. في الحياة الواقعية حنا تنعتامدوا على بزاف نتاع الحوايج باش نسيروا الحياة القانونية نتاعنا… بحال مثلا إلا كانت عندي شي ملكية مثلا أرض, خاص يكون عندي إتباث كيتبث أن داك الأرض دياليك. وفالغالب كيكون هد الاتباث ورقة تتعطالك من طرف واحد الجهة حكومية متخصصة تتبث الملكية نتاعك لداك الارض. وهكدا دولي, فاش تتبغي تصيفط شي فلوس مثلا من المغرب ل شي دولة أخرى خاصك تستاعن بواحد الجهة ثالثة أولا باش تبث أن نتا راه عند داك الفلوس للي باغي تصيفط وثانيا عملية الارسال تتكون عن طريق نتاعها… يقدر يبالك هد شي عادي ولكن تيق بيا هد شي عندو بزاف نتاع المساوء بلما نهدرو على المركزية نتاعو… هنا اسيدي جاو واحد المجموعة نتاع الناس تحت واحد الاسم معين قالك هد شي مامسلكش خاصنا نديرو البديل.
(للإشارة ف التقنية نتاع البلوك شين الفكرة نتاعها قديمة وماشي الكروب نتاع ساطوشي ناكاموطو للي بتكرها هو فقط طورها).
البديل شنو هو ؟ هو أننا نديرو شي تقنية للي تكون تتخدم بواحد الفعالية عالية و تكون شبه مستحيل إلا مقلناش مستحيل أن يتم الإختراق نتاعها… للي غادي نبقاو نديرو المعاملات نتاعنا فيها سواءا المالية او التجارية إلخ… بكل بساطة تخايل معايا أننا عندنا واحد الدفتار فيه كل واحد فهاد العالم… وقدام الاسم ديال كل واحد، حدا داك الواحد شنو عندو (الفلوس , الممتلكات…), وهد الدفتار أي واحد فهد العالم كيشوفو وفنفس الوقت العالم كولو كيتبت أو كينفي الصحة نتاع شي حاجة. مثلا نتا بغيتي تسيفط الفلوس لشي حد أخر ولكن نتا معندكش الفلوس فراه العالم كولو شايف أن نتا فداك الدفتار معندك والو يعني فاش غادي دير طلب باش تسيفط شي فلوس العالم كولو غادي يوقف فوجهك ويقول ليك حبااااااس أشريف نتا معنك والو وحنا مغديش نقبلو على طلب نتاعك بالارسال نتاع هد الفلوس للي اصلا معندكش…
أواااه كيفاش العالم كيشوف شنو عندي!! غا بشوية اساط العالم كيشوف شنو عندك من خلال واحد السمية ماشي سميتك ولكن نتا بوحدك للي عارفها أنها ديالك (مثلا انا سميتي محمد الجناتي وعندي 50 درهم فداك الدفتار غتكون سميتي X وغير انا بوحدي للي عارف أن سميتي المزيفة هي X …
أوااه كيفاش العالم كولو كيوافق على شي معاملة إلا بغات تكون، واش أنا كل مرة أنبقا ندخل نقبل المعاملات للي تتوقع في العالم ولا نرفدهم!! ههه بشوية عليك هنا اساط كاينين واحد الحوايج تيتسماو العقود الدكية هوما للي كيوافقو ولا كيرفدو أي معاملة بطريقة اوتوماتكية بالاستعانة بخورزميات … المهم هو نتا غيكون عنكد المعاملات نتاع العالم كولو وأي واحد في العالم عندو المعملات للي كتجرى في العالم كولو بكل بساطة كولشي عندو كولشي.
(إلا مفهمتيش هد النقطة للي فاتت ديال كولشي عندو كولشي… سبق لينا وقلنا أن فاش تتطرا أي معامل خاصك توافق عليها وفاش تتوافق على شي حاجة تلقائيا تتخزن عندك وهكدا تتولي عندك كااااع المعملات للي طرات)
هكدا انكونو شوية عرفنا البلوك شين نظريا كيفاش تيخدم.
الفرق بين الاصدار الاول و الاصدار الثاني من الويب ؟
من أول متعرف شي حاجة سميتها الانترنيت, كان الانتشار نتاع صناعة المحتوى قليلة بزاف. وحتى الطريقة ديال التعامل كانت محدودة. بدون الدخول في تفاصيل حنا في غنى عنها, تمحورة النسخة الاولى من الويب للي تعرف web1 بالاستهلاك و الثباتة. الاستهلاك نتاع المحتوى للي كان في الغالب موجه للي ناس للي كيقراوه.
وكانت الانتاجية فيه نتاع مواقع الويب قليلة. وثبات نتاع المحتوى نتاعو يعني كان عندنا مواقع جامدة.
(static website). (المقصود بمواقع الويب الثابتة هو أن الغرض من الموقع كيكون فقط إصال معلومة مكتوبة لا أكثر ولا أقل…)
الاصدار الثاني من الويب هو للي عشناه حنا للي كانو فيه big tech أو الشركات الكبرى (Google , Facebook) للي تتحكم فالبيانات الموجودة وكيفية الاستخدام.
عرفنا فهد الفترة كثرة الاستخدام و الامكانية ديال الانشاء و ديناميكية نتا المواقع. الاستلام و الارسال ديال البيانات عبر شبكة الانترنيت + العديد من الحوايج للي كنعيشوها دبا مع النسخة الثانية نتاع الانترنيت…
على العموم الفرق بين النسخة الثانية و الثالث نتاع مواقع الويب هو اساسا كاين فكيفية تخزين البيانات, كيف ما تنعرفو ان الشركات الكبرى هي للي تتحكم في المعلومات للي كاينة في الانترنيت تتخزنها ف سرفيرات نتاعها تتعلجها تقدر تبيعها ولا تخدمها في تطوير برمجيات اخرى متعلقة ب
الذكاء الاصطناعي ميهمش ولكن المهم هو ان المعلومات نتاعنا معرضة لخرق الخصوصة في أي لحظة.
هنا في النسخة الثالث من مواقع الويب غادي نستغنيو على السرفيرات نتاع الشركات الكبرى في التخزين نتاع المعلومات نتاعنا. وغادي نديرو واحد الجهة مستقلة عندها طريقتها الخاصة في تخزين المعلومات بواحد السرية و أمان عالي… البلوك شين ديجا درناه باش نسجلو المعملات نتاعنا علاش منديروهش باش نخزنو المعلومات نتاعنا بنفس الامان. هد شي تماما للي كاين… الخلاصة هو غتكونة بلاصة وحدة في العالم هي لتتخزن جميع المعلومات بحيت ميمكن لتواحد يوصل ليها. بدلا من أن تكون كل شركة تتخزن المعلومات نتاع المستخدمين نتاعها بحدها وتتدير فيهم مبغات.
على العموم الاصدار الثالث من الويب عرف مجموعة نتاع الحوايج الجداد ومن أهم هد الحوايج هو دمج الدكاء الاصطناعي. هد شي غادي يوفر لينا واحد الامكانيات رهيبة وغادي يخلي التعامل نتاعنا مع مواقع الويب أكثر فعالية اكبر من أي وقت كان. مثلا في الاصدار الجديد يمكن لينا نفهمو المحتوى نتاع المقالات المكتوبة ونقدرو نفهمو حتى اللغات العامية بالمعنى الاصلي نتاعها. من هنا يمكن لينا نطوروا محركات بحث أكثر تطور بحيت غادي يكون البحت على المعلومة اسهل… وبزاف نتاع الحوايج الاخرى.